അല്ലാഹു നൽകുന്ന വിധികൾ (കളാഅ്) ജീവിതത്തിൽ സന്തോഷവും സങ്കടവും നൽകാം. കുഞ്ഞുങ്ങൾ ജനിക്കുന്നത് സന്തോഷമാണെങ്കിൽ മരിക്കുന്നത് സങ്കടമാണ്. ഇത് അല്ലാഹുവിന്റെ പരീക്ഷണങ്ങളാണ്. വിചാരണയില്ലാതെ സ്വർഗ്ഗത്തിൽ കടക്കുന്ന ഒരു വിഭാഗത്തെക്കുറിച്ച് റസൂലുള്ളാഹി (സ) പഠിപ്പിച്ചിട്ടുണ്ട്. ദുനിയാവിൽ നിരന്തരമായ പരീക്ഷണങ്ങളും പ്രയാസങ്ങളും അനുഭവിച്ചവരാണവർ.ദുനിയാവിൽ പ്രയാസം അനുഭവിച്ചവർക്ക് പരലോകത്ത് അള്ളാഹു സുഖം നൽകും.
നമുക്ക് പ്രിയപ്പെട്ടവർ മരിക്കുമ്പോൾ ക്ഷമിച്ചാൽ അതിനുള്ള പ്രതിഫലം സ്വർഗ്ഗമാണ്. മക്കളുടെ പരീക്ഷണമായാലും രോഗമായാലും അല്ലാഹുവിന്റെ വിധിയിൽ തൃപ്തിപ്പെടുക. രണ്ട് കണ്ണുകളുടെ കാഴ്ച നഷ്ടപ്പെട്ടിട്ട് ക്ഷമിക്കുന്നവന് അള്ളാഹു സ്വർഗ്ഗം നൽകും. ജീവിതത്തിലെ ഏറ്റവും വലിയ ഉപദേശം അല്ലാഹുവിന്റെ വിധികളിൽ സമാധാനിക്കുക എന്നതാണ്.
നമ്മൾ എങ്ങനെ പെരുമാറുന്നുവോ അങ്ങനെയായിരിക്കും നമ്മളോട് പെരുമാറപ്പെടുക. നന്മ ചെയ്യാതെ നന്മ പ്രതീക്ഷിക്കുന്നത് മണ്ടത്തരമാണ്. ബാർലി വിതച്ചിട്ട് ഗോതമ്പ് കൊയ്യാമെന്ന് കരുതുന്നതുപോലെയാണത്. നന്മ ചെയ്യാതെ സ്വർഗ്ഗം പ്രതീക്ഷിക്കരുത്.
സത്യവിശ്വാസിയുടെ ഏറ്റവും വലിയ ആയുധം ഈമാനാണ്. മൂവായിരം സൈനികരുമായി ഖാലിദ് ബിനു വലീദ് (റ) രണ്ട് ലക്ഷം ശത്രുക്കളെ നേരിട്ടത് ഈമാനിന്റെ കരുത്തിലാണ്. സലാഹുദ്ദീൻ അയ്യൂബി മസ്ജിദുൽ അഖ്സ മോചിപ്പിച്ചതും ഈ വിശ്വാസബലം കൊണ്ടാണ്.അലബ് അർസലാൻ എന്ന യോദ്ധാവ് 15,000 പേരുമായി 6 ലക്ഷം പേരെ നേരിട്ടതും കഫൻ പുട ധരിച്ച് മരണത്തിന് തയ്യാറായിറങ്ങിയതും ചരിത്രമാണ്.
ആരാണോ അല്ലാഹുവിനെ സൂക്ഷിക്കുന്നത്, അവരെ അല്ലാഹു സംരക്ഷിക്കും. ക്രൂരനായ ഭരണാധികാരി അബ്ദുല്ലാഹിബ്നു അലിയുടെ മുൻപിൽ സത്യം വിളിച്ചുപറയാൻ ഇമാം ഔസായി തയ്യാറായതും അല്ലാഹു നൽകിയ ധൈര്യം കൊണ്ടാണ്. "ഹസ്ബിയള്ളാഹു വനിമൽ വക്കീൽ" (എനിക്ക് അള്ളാഹു മതി, അവൻ ഏൽപ്പിക്കാൻ ഏറ്റവും നല്ലവനാണ്) എന്നത് ഏതൊരു അക്രമത്തിൽ നിന്നും സംരക്ഷണം നൽകുന്ന വലിയൊരു ദിക്റാണ്.
അല്ലാഹു നമ്മുടെ ഖൽബുകളിൽ ഒരിക്കലും അണഞ്ഞുപോകാത്ത ഈമാൻ നൽകി അനുഗ്രഹിക്കട്ടെ. ആമീൻ.
